Albarín Blanco

Variedá blanca de recímanu cónicu de 1 a 3 nales de compacidad media y pedúnculu curtiu. Les uves de color verde amarellentáu, tienen forma elíptica con tamañu y color uniforme y sabor con toque a moscatel. La fueya tien forma pentagonal con trés o cinco lóbulos, pigmentación antociánica de los nervios principales nel fexe y nel viesu. Senu peciolar y senos llaterales abiertos en forma de V. Ye conocida tamién como Blanco Verdín, sobremanera na zona de Ibias.

Albillo

Variedá blanca de recímanos de compacidad media unos clones y recímanos bien sueltos otros, pedúnculu de llargor mediu. Bagues esfériques o llixeramente entartallaes de color verde amarellentáu, magaya non coloriada y ensin nengún sabor particular. La fueya adulta tien forma pentagonal con siete lóbulos, pigmentación antociánica nula nos nervios principales tantu pol fexe como pol viesu. Senu peciolar abiertu o con lóbulos llixeramente superpuestos, con base en forma de V; senos llaterales con lóbulos ligermente superpuestos, bien fondos cola base en forma d’O. Ye conocida tamién como Arbillo.

Moscatel de Granu Menudu

Variedá blanca de recímanu cilíndricu y compactu, pedúnculu de llargor mediu. Les uves tienen forma esférica, de color verde amarellentáu, magaya non coloriada y con sabor a moscatel. La fueya tien forma pentagonal, con cinco lóbulos; pigmentación antociánica nula nos nervios principales tantu pol fexe como pol viesu. Senu peciolar poco abiertu o con lóbulos llixeramente superpuestos, cola base en forma de V y ensin particularidaes; senos llaterales superiores zarraos con lóbulos llixeramente superpuestos, abondo fondos cola base en forma de V, senos llaterales inferiores abiertos, poco fondos cola base en forma de V.